ခိုးမှုကိုကျူးလွန်ရန် အလို့ငှာသော်လည်းကောင်း၊ ခိုးမှုကိုကျူးလွန်ပြီးနောက် ထွက်ပြေး လွတ်မြောက်ရန်အလို့ငှာသော်လည်းကောင်း၊ ခိုးမှုကိုကျူးလွန်၍ရရှိသောပစ္စည်းကို ဆက်လက်ထားရှိ နိုင်ရန်အလို့ငှာ သော်လည်းကောင်း သူတစ်ဦးဦးကိုသေစေရန် သို့မဟုတ် နာကျင်စေရန် သို့မဟုတ် တားဆီးရန် သို့မဟုတ် သေစေမည်ဟုဖြစ်စေ၊ နာကျင်စေမည်ဟုဖြစ်စေ၊ တားဆီးခံရမည်ဟုဖြစ်စေ ကြောက်ရွံ့စေရန် ပြင်ဆင်ပြီးမှ မည်သူမဆိုခိုးမှုကိုကျူးလွန်လျှင် ထိုသူကိုအလုပ်ကြမ်းနှင့် ဆယ်နှစ်ထိ ထောင်ဒဏ်ချမှတ်ရမည့်ပြင် ငွေဒဏ် လည်းချမှတ်နိုင်သည်။

ဥပမာများ

(က) A သည် Z ၏ လက်ရှိမှပစ္စည်းကို ခိုးယူ၏။ ထိုသို့ ခိုးယူရာတွင် အကယ်၍ Z က ခုခံခဲ့သော် Z ကို နာကျင်စေရန် အလို့ငှာ ယမ်းထိုးပြီး ပစ္စတိုသေနတ်တစ်လက်ကို မိမိ၏ အဝတ်အတွင်း၌ ထားရှိ၏။ A သည် ဤပုဒ်မတွင် အဓိပ္ပာယ်ဖော်ပြထားသော ပြစ်မှုကို ကျူးလွန်သည်မည်၏။

(ခ) ဖြစ်ပျက်ပုံ အခြေအနေကို Z မြင်၍ ခုခံခဲ့လျှင်သော်လည်းကောင်း၊ မိမိအား Z က ဖမ်းဆီးရန် အားထုတ်ခဲ့လျှင်သော်လည်းကောင်း Z ကို တားဆီးရန်အလို့ငှာ မိမိ၏ အပေါင်းအဖော်များကို အနီးအပါး တွင် နေရာချထား၍ A သည် Z ကို ခါးပိုက်နှိုက်၏။ A သည် ဤပုဒ်မတွင် အဓိပ္ပာယ်ဖော်ပြထားသော ပြစ်မှုကို ကျူးလွန်သည်မည်၏။